Министерството за надворешни работи повторно ќе ги поднесе измените на Законот за рестриктивни мерки на утрешната седница на Владата, иако Министерството за правда повторно даде негативно мислење, со образложение дека предложените решенија се против уставниот поредок и суверенитетот на државата!

Со овие законски измени власта сака да ги казнува лицата што се нашле на „црните листи“ на САД и на Велика Британија, да им замрзнува и одзема имот, да ги отстранува и да им забранува јавна функција, да им забранува учество во тендери и ред други мерки само со владина одлука, врз основа на сомнение и без правосилна судска пресуда, а МНР ќе му наложува на Јавното обвинителство веднаш да отвора истрага против тие лица и да ја заврши во рок од шест месеци!

Ново одобрување во Владата

Ова законско решение минатиот месец го промовираше министерот за надворешни работи Бујар Османи, а Владата на Димитар Ковачевски на 16 јануари го усвои со консензус и го поднесе во Собранието неколку денови пред оставката на премиерот. Потоа техничката влада, на чело со Талат Џафери, го повлече со образложение дека „предлогот административно оди на ново одобрување на наредната владина седница и ќе биде доставен до Собранието“.

Во петокот, на средбата во Владата со американската амбасадорка Анџела Агелер, Џафери ја информирал дека за предлог-законот за рестриктивни мерки се прават дополнителни и сеопфатни консултации, по што повторно ќе се разгледува на следната владина седница.

За првичното предложено решение, Министерството за правда даде негативно мислење, а исто негативно мислење е испратено до Владата и за „ревидираниот“ предлог, чија содржина уште не е позната за јавноста.

– Министерството за правда останува на претходно даденото негативно мислење за Законот за рестриктивни мерки. Предложеното дополнување на наведениот Закон, со кое би можеле да се воведуваат, изменуваат и престануваат рестриктивните мерки врз основа на ,,правни акти на Соединетите Американски Држави и правни акти на Обединетото Кралство” е во спротивност со уставниот поредок и суверенитетот на Република Северна Македонија. Наведеното, исто така, е спорно од аспект на тоа дека меѓународните рестриктивни мерки се донесуваат врз основа на правни акти на меѓународните организации (ООН, ЕУ и други), со цел унифицирање на безбедносната политика на меѓународната организација со нејзините членки – велат од Министерството за „Слободен печат“.

Кој Устав го читаат во МНР?

Министерството за правда смета дека воведувањето на рестриктивни мерки со одлука на Владата врз основа на сомневање не е во согласност со Уставот и со системот на казненото право воопшто.

– Предложените измени се во спротивност и со Европската конвенција за човекови права, како и со принципот на владеење на правото и правната држава. Постоењето основи на сомневање во хиерархијата на кривичното право за постоење докази кои укажуваат на сторено кривично дело е втор степен. Истакнуваме дека првенствено постојат оперативни сознанија за сторено кривично дело, потоа основи за сомнение и на крај обвинување. Со предвидувањето на ваков праг, врз основа на кој би се воведувале рестриктивни мерки, меѓу кои и „ембарго“ и „замрзнување на имот“, се нарушуваат концептите на владеењето на правото и на правната држава – велат од Министерството за правда.

Од Министерството укажуваат дека овој Предлог-закон би требало да се достави на мислење на Венецијанската комисија и до Европската комисија.

Министерот за надворешни работи Бујар Османи потврди дека тој ќе го поднесе Предлог-законот на денешната владина седница.

– Јас ќе го предложам, а дали ќе помине на Собрание, баш би сакал да видам кој ќе го блокира. Имаше дебата зошто е повлечен, дали е од политички причини или не. Имаше нова влада, сепак новата влада треба да го брани законот во Собрание. И се разбира треба уште еднаш да се потврди, а имаше и дополнително усогласување – рече Османи во интервју на ТВ 24.

Освен Османи, овој закон силно го брани и вицепремиерката за добро владеење Славица Грковска, која во повеќе наврати изјави дека земјата не смее да ги игнорира пораките од САД, кои се однесуваат на борбата против корупцијата и мора да презема конкретни чекори.

За разлика од министрите, експертите силно се спротиставија на донесувањето на вакво законско решение, оценувајќи го како неуставно и со порака дека ќе падне на Уставен суд.

Професорот Гордан Калајџиев на Фејсбук напиша дека новиот предлог не се разликува битно до претходниот што беше повлечен.

– Избројав 11 одредби од Уставот што се кршат со тн. Закон за рестрикции: 8, 13, 14, 23, 30, 50, 52, 54, 98, 106 и 107! Машала! – предупредува проф. Калајџиев.

Пред неколу месеци, САД го ставија на својата т.н. „црна листа“ бизнисменот Кочо Анѓушев, поранешен вицепремиер за економски прашање, поради „вмешаност во значителна корупција“. На оваа листа се и градоначалникот на Струга, Рамиз Мерко, бизнисменот Орце Камчев, поранешниот премиер Никола Груевски, ексдиректорот на ДБК Сашо Мијалков и други.
По ставањето на Анѓушев на американската „црна листа“ претставници од власта, на чело со Османи и Грковска, најавија дека со законски измени ќе овозможат веднаш да се преземат мерки кон лицата што се нашле на вакви листи на нашите меѓународни партнери.