Денеска продолжува четвртото коло од Првата македонска фудбалска, во кое тимот на Тиквеш ќе има задача да стигне до првата победа. Денешен противник од 16.30 часот е Брера, екипа што пристигнува во Кавадарци со свои амбиции и пресметки.

Во Кавадарци ситуацијата не е сјајна, тамошната јавност бара победа и бодови, па екипата е реално под императив на успех.

– Имаме лош старт на сезоната, тоа не е спорно. Сепак, знам дека овој тим на Тиквеш заслужува и може многу повеќе од ова. Сигурен сум дека ќе го докажеме уште денеска. Брера е млад, но квалитетен тим. Бев во Струмица долг период и добро ги познавам повеќето од играчите. Секогаш е тешко да се игра против екипа што се брани. Сепак, ќе дадеме сè од себе за да ги освоиме трите бода, за нас, за клубот, за градот и за навивачите. Тоа Кавадарци и „Лозари“ го заслужуваат. Шампионатот е долг и Тиквеш уште има многу што да каже на теренот – вели фудбалерот на Тиквеш, Даниел Миловановиќ.

На спротивната страна фудбалерите на АП Брера ќе се обидат да стигнат до позитивен резултат како што тоа го направија на претходното првенствено гостување, на Арената „Тодор Проески“ против Вардар, кога одиграа 2:2. Тоа издание на тимот, тој натпревар, треба да биде урнекот како да одигра составот на Панче Стојанов и на денешниот дуел со Тиквеш.

– Нема да биде лесно, но доколку одиграме како на минатото гостување против Вардар, можеме да се надеваме на позитивен исход – најавуваат од Брера.

Брера по три одиграни кола има еден бод, токму од гостувањето во Скопје, а идентично е бодовното салдо и на Тиквеш.