Екипата на Борусија Дортмунд планира во наредната сезона да ја урне доминацијата на големиот ривал Баерн Минхен во Бундес лигата и ова лето потроши повеќе од 100 милиони евра за засилувањата, но не планира да застане тука.

„Милионерите“ упатија официјална понуда во висина од 42 милиони долари за услугите на Бразилецот Малком. Понудата е прифатлива за Барселона на која и се потребни средства за трансферот на Нејмар. Згора на тоа, по доаѓањето на Антоан Гризман од Атлетико Мадрид, Бразилецот стана прекуброен во каталонскиот клуб.

Малком имаше и понуди од неколку екипи од Англија, но стануваше збор за позајмица со право на откуп на договорот, а Барселона ги одби сите сите понуди бидејќи сака да го продаде Бразилецот уште летово.

Се очекува трансферот да биде реализиран по враќањето на Барселона од турнејата во Јапонија, а Борусија се покрај Малком во финишот на преодниот рок планира да го купи и младиот напаѓач на Јувентус, Моисе Кин.