Екипата на Вардар и аргентинскиот тренер Гиљермо Милано постигнаа договор за продолжување на соработката, со што искусниот стратег ќе го води најтрофејниот македонски клуб и во следната сезона.

Милано пристигна во Скопје во ноември 2024 година и од тогаш постигна импресивен биланс 18 победи, две ремија (двете на гостински терен) и само еден пораз, па продолжувањето на соработката можеше и да се очекува. Под негово водство Вардар го совлада Мелсунген во Скопје во натпревар од Лигата на Европа и забележа голема победа на гостувањето кај Еурофарм Пелистер во Битола.

Сезонава црвено-црните се во битка за двојната круна. Овој викенд ќе настапат во полуфиналето на Ф4 турнирот што се игра во Охрид, додека во Првата лига ги чека борба до самиот крај.  До крајот на сезоната ги очекуваат два важни натпревари, прво гостување кај Тиквеш, а потоа и дербито со Пелистер пред домашна публика, кое може да биде одлучувачко за титулата.

Милано е тренер со над две децении искуство, а неговото ракометно портфолио вклучува работа во клубови и со машката репрезентација на Аргентина. Учествувал на повеќе од 50 меѓународни турнири, вклучително и четири Олимписки игри, 19 Светски првенства, како и бројни континентални натпреварувања.