Јапонскиот производител на автомобили „Мицубиши“ планира да не учествува во предложеното спојување со уште двајца јапонски гиганти – „Хонда“ и „Нисан“, но ќе соработува со конкурентите како независен производител на автомобили, јавуваат медиумите.

Одлуката значи дека корпорацијата „Мицубиши Моторс“ ќе продолжи да котира како посебен ентитет на берзата, надвор од заедничкиот холдинг што минатиот месец го најавија компаниите „Хонда Мотор“ и „Нисан Мотор“.

Откако ова го јави јапонскиот весник „Јомиури“, „Мицубиши“ одговори со соопштение во кое се наведува дека компанијата сè уште ги разгледува сите можности и дека нема донесено конечно решение.

Извршниот директор на „Мицубиши“, Такао Като, кој беше на бината заедно со своите колеги од „Хонда“ и „Нисан“ при објавата за спојувањето на 23 декември, тогаш рече дека неговата компанија до завршетокот на јануари ќе реши дали ќе учествува во големото спојување. „Нисан“ инаку е најголемиот поединечен акционер во „Мицубиши“.