Претседателот на ВМРО-ДПМНЕ Христијан Мицкоски во гостување на Сител рече дека во првиот круг на парламентарните избори имало гласања што траеле помалку од 1 минута, што било невозможно и дека набљудувачите го констатирале тоа.

„Ние затоа и ги повикавме институциите, затоа ги повикавме и меѓународните набљудувачи да излезат на терен. И ги потенциравме буквално сите оние избирачки места каде што имаме таков тип на девијантно однесување“, рече Мицкоски.

Појасни дека станува збор за општините Сарај, Липково, Арачиново.

Тој обвини дека СДСМ и ДУИ имале намер да ги добијат симпатиите на гласачите не со политичка програма, туку со притисок.

Тој повтори дека ВМРО-ДПМНЕ нема да прави влада со ДУИ и запраша како да прави коалиција со луѓе кои што на насилен начин се обидуваат да ја освојат волјата на граѓаните.

Обвини дека вицепремиерот на владата испратил писмо до одредени лица велејќи им да гласаат за него.

„Денеска имаме ние писмо кое што го испраќа вицепремиерот на Влада, каде што вели луѓе јас како вицепремиер се заложив да вие добиете добивка и во име на тоа барам од вас да вие го дадете вашиот глас за мене“, рече Мицкоски.