Власта во отсуство да го испорача ветеното, сега оди коленичи по светот и меѓународната заедница ја моли да доаѓа во Македонија и ја притиска да прави туртура и притисоци на ВМРО-ДПМНЕ, но притисоците нема да успеат, изјави Христијан Мицкоски, претседател на ВМРО-ДПМНЕ пред најавената средба со заменик – помошникот државен секретар на САД Габриел Ескобар кој од денеска е во дводневна посета на Скопје и ќе има средби со шефот на државата Стево Пендаровски и со премиерот Димитар Ковачевски.

-Ние аргументирано ја браниме нашата позиција, односно позиција на огромно мнозинство македонски народ и македонски граѓани. И она што е најважно ВМРО-ДПМНЕ како партија за македонско национално единство нема друга опција, треба аргументирано да се спротивстави на овие криминални политики на Владата која не може да ги испорача сите работи кои ги презела како обврска. Во едно такво отсуство, сега тие одат, коленичат по светот и меѓународната заедница ја молат да доаѓа во Македонија и ја притискаат да прави туртура и притисоци на ВМРО-ДПМНЕ, а преку ВМРО-ДПМНЕ и врз огромното мнозинство граѓани на Македонија. Но, ќе ги разочарам дека такво нешто нема да успее – рече Мицкоски.

Тој додаде дека тоа било јасно уште на 18 август кога се гласаше дневниот ред во Парламентот, но и предходно кога на уставната комисија се гласаше потребата од уставни измени и беше јасно дека владеачкото мнозинство нема две третини.

Тој за претстојната средба со Ескобар повтори дека е важно секој кој што доаѓа во Македонија да има добра намера и дека секоја добра намера за нив е добредојдена.

-Кога зборувам за добрата намера, зборувам за аргументите кои што очекуваме да ги слушнеме од другата страна, но и очекуваме другата страна да ги слушне нашите аргументи. Она што е важно и што треба секој еден да го знае е дека Владата го изгуби кредибилитетот и таа е едниствената пречка за интеграција на Македонија во ЕУ и единствената пречка на патот кон ЕУ и колку ова побрзо го свати толку побргу ќе се придвижат работите напред. Брзи парламентарни избори се единственото решение ако сакаме да се движиме напред, се друго е тапкање во место и уназадување. Ако чекаме на пролет да има избори само ќе изгубиме неколку месеци. Се додека има почит ќе има почит и од наша страна, доколку видиме отуство на почит тогаш не треба да очекуваат почит и од наша страна – вели Мицкоски.

На прашањето дали би прифатил нова лидерска средба за уставните измени, Мицкоски рече дека „на масата нема веќе ништо“. Може да се разговара само за предвремени избори, рече лидерот на ВМРО-ДПМНЕ и оцени дека власта нема кредибилитет и дека не може да одлучува за нешто што 80 отсто од Македонците не го прифаќаат и 60 отсто од жителите на земјата.

-Не е европска вредност да клекнете во Софија и да потпишете договор за да го обезличите вашиот народ. Тоа е предавство и за тоа историјата ќе суди – додаде тој.