Претседателот на ВМРО-ДПМНЕ, Христијан Мицкоски упатил јавна порака до албанската опозиција за коалицирање, но, како што рече, одговор до овој момент нема добиено.

-Упатив официјална порака до албанската опозиција, официјален одговор на мојата официјална порака, до овој момент немаме добиено, изјави Мицкоски по средбата со Управниот одбор на МАСИТ во Скопје.

Одговарајќи на новинарско прашање за предлогот на Бујар Османи министер за надворешни работи и кандидат за претседател од ДУИ за постигнување на заеднички консензус за уставните измени, претседателот на ВМРО-ДПМНЕ истакна дека „Османи за таков консензус ја има испуштено можноста“, кога, како што рече ВМРО-ДПМНЕ и тој лично на прес-конференција се понудиле да бидат дел од процесот, кој што, според него, го воделе шверцерски и тајно, зад очите на јавноста.

-И ако тој навистина сакаше политички консензус и консензус народен тогаш имаше таква можност како министер за надворешни работи. За жал тој се однесуваше неодговорно, авантуристички, егзибиционистички и направи историска грешка најпрвин што го лажеше сопствениот народ, а потоа што го потпиша вториот Протокол, каде што дозволи работата на Комисијата, којашто има за цел да ги утврди историските факти, да биде критериум за напредок на Македонија до полноправно членство во Европската унија, изјави Мицкоски.