Премиерот Христијан Мицкоски очекува ВМРО-ДПМНЕ и коалициските партии да имаат убедлива победа на локалните избори. За опозициската СДСМ прогнозира дека можеби нема да освојат ниту една општина, иако засега се конкурентни во четири општини.

-Јас очекувам, врз бројките коишто ги добивам, убедлива победа на ВМРО-ДПМНЕ и коалицијата којашто ќе ја предводи ВМРО-ДПМНЕ. На настанот вчера јасен бев и прецизен, можеби онаму каде што е конкурентен СДСМ се две до три, максимум четири општини. Да бидам искрен, ако вака продолжат неодговорно да се однесуваат, можеби и да не освојат општина на следните локални избори. Гледам и тие малкумина коишто ги поддржуваат играат на картата на кратко помнење на граѓаните и нормално нихилистичка политика, сè што прави оваа Влада не чини, па не може сè што прави оваа Влада да не чини – изјави Мицкоски за време на посетата на тренинг центарот во Идризово.

Тој посочи дека опозициската партија води политика преку која критикува сè што Владата прави, а за него, тоа не е во ред, и додаде дека не може да не чини сè што тие прават.

-Не може сè по која било основа да се критикува, вклучувајќи го договорот со Обединетото кралство – порача Мицкоски.