Претседателот на владата Христијан Мицкоски во говор по повод 8 Септември на свечената академија по повод независноста на Македонија предложи платформа со 10 точки, околу која побара да се обединат сите општествени чинители – универзитетите, синдикатите, коморите, земјоделците, МАНУ, професорите, лекарите, сите општествени двигатели. Првиот принцип што го спомена Мицкоски е воспоставување правда и правна држава и тоа не само флоскулно и декларативно, туку суштински, преку лични примери и колективни откажувања од сите оние што решиле да се посрамотат себеси и своите семејства и да отидат од другата страна на законот.

-Незаконието не смее да се следи, без разлика кој е и што е. Или ќе е чесен граѓанин или ќе одговара за своите постапки независно дали е власт или опозиција. Второ, да се прекине партизацијата на општеството и да не се делат луѓето од едната или другата партија. Треба да се делат на способни и помалку способни. Способните мора да напредуваат. Не смее партиската книшка да е дозволата за напредок, туку дипломата и реалното знаење. Мора меритот да биде над се друго. Вредните мора да добијат шанса наместо тие со врски. Трето, да се оградиме од меѓуетнички конфликти. Да ставиме мораториум на етнички произведени теми зад кои стои лукративниот интерес на поединци. Да се стави крај на долгата листа етнички права зад кои вистински стои ништо повеќе туку личниот интерес на тие што ги произведуваат за сметка на колективниот интерес. Колку само отсутно звучи, кога некој ќе побара дводомност, а во Липково нема вода за пиење?, праша Мицкоски.

-Многу порази, многу неуспеси, потфрлања во системот. Цврсто сум уверен дека човекот кој тогаш гласаше на референдумот тој 8 септември 1991 година, тогаш не ја замислуваше Македонија каква што ја имаме денес. Но дали после децениските разочарувања, битката треба да престане? Одговорот е никако и тоа не е опција. Затоа што патриотизмот постои и денес и денес оваа генерација ја има битката која треба да се издвојува. Тогаш битката беше како ќе се исправиме на нозе, а денес е како да направиме големи чекори напред, рече Мицкоски.

Четвртиот принцип за кој Мицкоски побара општествено обединување е подобрувањето на стандардот на граѓаните преку работа. Петто, побара праведно општество.

-Ги разбирам компаниите чии маржи ги ограничивме за училишен прибор, но да го објавам и списокот на нивните маржи од кои боли глава, каде ќе видите дека некој дебело заработува врз осиромашениот народ. Ја почитувам и се борам за слободната економија, но народот не е наивен. Не треба да се создава монопол или дуопол и дебело да се полнат приватните џебови. Шесто, мора образованието да е билетот за успех и се да вложиме за тоа. Нашите луѓе во светот постигнуваат извонредни резултати а дома факултети во сомнителни објекти штампаат дипломи, рече премиерот.

Како седма точка ја наведе општата согласност за стратешката цел – приклучување кон Европската Унија.

Не смееме да отстапиме од европскиот пат но мора да се знае горкото чувство кое го има секој наш човек, дека предолго чекаме пред вратите на унијата. Секој македонски граѓанин има грутка во грлото од премногу отстапки и штетни договори. Спремен сум за секое прашање да разговарам, но не сум спремен за остапка по секоја цена. Осмиот принцип е единството за државните прашања особено надвор од државата, рече Мицкоски.

Деветтиот принцип на премиерот е борбата против иселувањето.

-Премногу светилки се изгасија, нема луѓе за работа, погледнете ги полињата. Во период на гроздобер полни се со повозрасни луѓе и по некој млад што не сака да ги разочара родителите. Генерално младите луѓе си одат и тоа е поразително. Мора да ги задржиме со подобри услови за живот и шанса за младите што мора да се движечка сила. Десетто мора да веруваме во заеднички идеолошки битки. Мојата е патриотизмот кој треба да не обедини. Тој е заедничко верување и борба за иднина. Тој треба да не обедини Македонци, Албанци, Турци, Роми, Власи, Срби, Бошњаци под македонското сонце. Премногу е пропуштено и треба многу да се направи, рече Мицкоски.

Тој додаде дека целите и работите што мора да се победат денеска, се различни. Двете големи цели, како што вели Мицкоски, се да се победат разочарувањето кај секој еден човек, напластено од сите претходни порази. Втората цел е да се сузбие криминалот и корупцијата метастазирани во сите делови од општеството, кои претставуваат и безбедносен проблем.

-Денес голем дел од луѓето сосема оправдано се разочарани од многу работи. Таквото разочарување е плод на континуирано рушење на системот и газење на базичните принципи и отстапки правени децении претходно. Многу одлуки се донесоа кои граѓаните ги почувствуваа како личен пораз. Големи кнедли беа проголтани и како диво месо се распространија во срцето на нашиот организам. Сето тоа искуство сега ни носи разочарување и дилема кај многу луѓе дали ќе успееме. Тоа разочарување натера многу луѓе да си заминат, а мнозина се дистанцираа од политиката. Но ве уверувам дека има надеж и ќе се борам до последниот атом да докажам дека сме поразлични од се досега и дека ги менуваме работите, рече Мицкоски.

Мицкоски зборувајќи за криминалот и корупцијата рече дека „ова зло ја разјадува државата одвнатре и ја руши довербата меѓу институциите и граѓаните“.

Корупцијата е како отров, кој го слабее нашето општество правејќи да се изгуби надежта за подобро утре. Како премиер јавно истакнувам дека ја преземам личната обврска да ја водам оваа борба со непоколебливост и со одлучност. Секој од нас мора да е дел од оваа битка, бидејќи корупцијата не е само проблем на владата, туку проблем на целото општество а и безбедносен проблем, рече Мицкоски.

Неговата визија, истакна дека е земја во која владее законот и нема место за корумпирани.

Граѓаните заслужуваат да живеат во средина каде чесноста е водечки принцип. Време е да се стави крај на беззаконието и да се заштитат интересите на граѓаните. Криминалот не смее да биде посилен од владата и на ова зло му доаѓа крајот. Сите што со ташни шетаа кај претходната влада сега бегаат зашто го знаат одговорот. Ние ова зло ќе го победиме, рече Мицкоски.

Во врска со националните интереси, Мицкоски рече дека „тие ќе бидат заштитени по секоја цена“.

Нема да бидеме монета за поткусурување на никој. Ќе се бориме за нашите интереси и достоинство и ве уверувам дека ќе успееме, додаде премиерот.

Тој рече дека на народот му треба верба во принципи и јасен план.

И тие принципи мора да се нештото околу кое сите ќе се согласиме и ќе постигнеме општествен консензус. Самите мора да го произведеме тоа а не да ни биде подарено на тацна или на документ даден однадвор. Да покажеме зрелост. Разочарувањето и цинизмот се оправдани но секој мора да е активен општествено и да придонесува кон заедничко добро. На владата и мене како премиер, потребни ни се сите. Опозицијата да созрее наместо да биде параван на криминални политичари. По етничка основа треба да сме обединети, додаде Мицкоски.