Премиерот Христијан Мицкоски денеска изјави дека намалувањето на американските царински стапки за македонски производи од 33 на 15 проценти претставува прва фаза во трговските преговори со САД. Тој потенцира дека ова не е конечен договор и најави продолжување на преговорите по летните одмори, во втората половина на август.

„Станува збор за трговски маржи, не за класични царини. Очекуваме преговорите да продолжат и се надевам дека ќе дојде до уште поголемо намалување на тарифите“, рече Мицкоски, истакнувајќи дека Македонија сега се наоѓа во иста група со ЕУ, Израел и Норвешка.

Трамп од 7 август воведува дополнителни царини од 15 отсто за десетици земји меѓу кои е и Македонија

Според новата извршна наредба на американскиот претседател Доналд Трамп, која ќе стапи во сила на 7 август, САД воведуваат нови царини меѓу 10 и 50 проценти за државите кои немаат трговски договор со Вашингтон. Македонија добива царинска стапка од 15 проценти, исто како и ЕУ, Хрватска и Словенија. За Србија царината ќе биде 35 отсто, за БиХ 30, а најниска стапка доби Црна Гора – 10 проценти.

Мицкоски ја изрази својата благодарност до американската страна за досегашната корекција на тарифите, оценувајќи ја како значаен чекор кон подобрување на економската соработка.