Премиерот Христијан Мицкоски ја оцени средбата со германскиот канцелар Олаф Шолц на самитот на Берлинскиот процес како доста продуктивна и потврди дека Германија останува наш силен и активен поддржувач. Тој уште еднаш го пренел ставот на Владата дека во изминатите децении премногу имаме дадено, и како народ и како држава, и дека заслужуваме шанса да ги почнеме процесите безусловно.

-Канцеларот Шолц потврди дека Германија е наш силен сојузник, не водиме политика на свиткана кичма, заслужуваме да ги отвориме поглавјата кон ЕУ – порача Мицкоски.

Мицкоски од Берлин посочи дека пред присутните ги презентирал и приоритетите на Владата.

-Ова беше добра можност да ги претставиме нашите планови во делот на економијата и во делот на нашата амбиција да бидеме раскрсница на Балканот, во смисла на тоа да бидеме раскрсница на енергетските текови, патната инфраструктура и железничката инфраструктура, бидејќи и природно и географски, ние сме таа раскрсница на два важни европски коридори, коридорот 8 и коридорот 10 – истакна Мицкоски.

Во делот на енергетиката тој истакнал дека целта е државата да стане потполно енергетски независна.

-Наша политичка, но и економска цел е до 2026 година да произведуваме онолку домашно количество на електрична енергија, колку што и ќе трошиме, односно да бидеме и увозници на електрична енергија, а до 2027 година со реализирање на проектите на овој план и да бидеме извозници – изјави премиерот.

Во разговорите на берлинскиот процес Мицкоски го отворил прашањето и за евроинтегративните процеси на државата. Тој уште еднаш го пренел ставот на Владата дека во изминатите децении премногу имаме дадено, и како народ и како држава, и дека заслужуваме шанса да ги почнеме процесите безусловно. Според него, заслужуваме да ги отвораме поглавјата и да ги покажеме нашите капацитети за тоа колку бргу ќе ги затвораме.

-Притоа останувам подготвен да разговарам со кого било за да изнајдеме решение коешто на долг рок ќе значи вистинско решение со јасен крај, а крајот треба да биде членство на Македонија во рамките на Европската Унија – изјави од Берлин премиерот Христијан Мицкоски.