Лидерот на опозициската ВМРО – ДПМНЕ, кој деновиве е во Виена каде заедно со својата делегација зеде учество на конгресот на Европската народна партија (ЕПП), порачува дека партијата која ја предводи е подготвена на рамноправна основа да преговара за европска иднина на земјава, на која како што истакна би се реафирмирале вистинските европски вредности, врз основа на кои почива самата Европска Унија.

Тој вели дека врвен приоритет доколку станат идна власт во земјава ќе биде борбата против криминалот и корупцијата.

Ваквите негови изјави доаѓаат по средбата што денеска ја имал со министерката за Европа и Устав во австринската Влада, Каролина Едстадлер, која како што вели е прва, од многуте планирани со функционери во австриската Влада.

На неа, како што кажа, ги објасниле позициите на ВМРО-ДПМНЕ од нивната изборна програма, која, вели, практично ќе биде програма на идната влада на земјава што според него ќе ја предводи ВМРО-ДПМНЕ.

„Сите оние коишто се огрешиле пред законот треба да сносат последици за тоа што го направиле со фокус на овие политички криминалци во најкорумпираната влада во Југоисточна Европа и Западен Балкан“, вели претседателот на ВМРО-ДПМНЕ.

Тој се осврна и на евроинтеграциите на земјава. Вели дека под нивно водство владата ќе биде проевропска и главен фокус ќе биде интеграцијата на Македонија во Европската Унија, но „на еден различен начин од тоа што го правела досегашната влада“.

„Ние нема да коленичиме и да бидеме подлизурковци и измеќари. И нема да ги распродаваме националните интереси, порача Мицкоски во изјава за ТВ Алфа.

Според Мицкоски, ставот на ВМРО-ДПМНЕ во врска со ова прашање е принципиелен и таков ќе остане и по изборите.

Инаку, Мицкоски и ВМРО-ДПМНЕ се децидно против уставните измени со кои Бугарите би влегле во Преамбулата на Уставот, што е услов за продолжување на преговорите со Европската Унија, односно за отворање на кластерите и поглавјата од преговарачкиот процес.