Мицкоски: Му простувам на таткото што изгуби син во „Пулс“ а ме навредуваше
Премиерот Христијан Мицкоски во вечерашното интервју на „Сител“ изјави дека сочувствува со болката на семејствата од Кочани и му простува на родителот кој загуби дете што го навредувал на камера. Запрашан што бараат родителите од Кочани од него, Мицкоски рече:
Препорачано
-Сега не би можел да кажам што бараат. Сочувствувам со нивната болка. Трагедијата беше ужасна и не задеси после 8 месеци влада. Она што го направивме ретко кој го има направено. Информацијата денес што ја добив е дека и последниот критичен пациент излегува од таа фаза од повредените. Првата група на Пониква помина со прв рехабилитационен период, сега ќе дојде втората група. Ќе ја следиме состојбата како здравствен систем и ќе направиме се за да одговориме позитивно. Знам дека луѓето од мојот кабинет се во континуирана комуникацја со повредените и фамилиите на починатите. Оној родител кој ме навредуваше, му простувам тоа е специфична ситуација во која не би можел да замислам како се чувствува човекот, рече Мицкоски.
Зборувајќи за „денокот за намажени и неженети“, идеја што ја размислуваше па од која се откажа, премиерот рече дека не се исплашил од бурните реакции на јавноста, туку дека желбата му била да ја крене свесноста за проблемот кој како што смета премиерот – се стреми да стане „катаклизмичен за иднината на државата и нацијата“. Премиерот рече дека ќе се работи на комбинирани мерки за да се спречи белата чума и нискиот наталитет. Меѓу нив спомена 6 ин-витро бесплатни процедури наместо досегашните 3, стимулација со ослободување од персонален данок на доход за мајките. Сепак премиерот повтори дека финансиските стимуланси според него и примерите кои ги цитираше за други држави во светот, не се гарант за зголемување на наталитетот туку тоа е промената на свеста. „Изумираме тивко и полека, мора да бидеме свесни“, рече тој.
-Мора да работиме со дечињата, од најрана возраст да сфатат во својата перцепција дека семејството е јас мама тато бато и дада. Умот и срцето се најважни, стимулансите ќе ги дадеме, рече Мицкоски.
Тој рече дека наскоро ќе се знае во кои општини ЗНАМ би имале кандидат поддржан од ВМРО-ДПМНЕ и обратно, но разговорите се одвивале во констуктивен дух и пријателска атмосфера.
Зборувајќи за македонскиот јазик во извештајот на Европската Комисија, Мицкоски потенцираше дека никогаш порано, до оваа година во Европскиот Парламент гласно не се зборувало за македонските идентитет и јазик.
-Ова беше првпат македонскиот идентитет и јазик да бидат дел од извештај. За првпат сите европарламентарци ќе го имаат ова пред себе и некои од нив со талибански навики ќе предложат амандман да се избрише македонскиот идентитет и јазик. На сите им стана јасно во Брисел дека проблемот не се неколку стотини Бугари во македонскиот Устав, туку многу е подлабоко ова. Направена е историска штета од 2020 година навака и тоа не ја намалува нашата болка. Но поголем е бројот на нашите сојузници што ја сфаќаат вистината. Вакви работи во 21 век во Европа се спротивни на европските вредности, рече премиерот.
Зборувајќи за други теми, посочи дека има оглас за 400 нови пожарникари. За тарифите од САД рече дека нема да коментира, но дека во моментов се воделе преговори со администрацијата на Доналд Трамп за тарифите.
Запрашан за случајот со пешакот Југослав кој беше смртно прегазен од моторџија пред зградата на кејот каде фрлал ѓубре, а потоа возачот доби куќен притвор премиерот рече:
Мојот став за работата на судскиот совет, судството и обвинителството ги знаете. Не очекувам дека ќе се застане, ќе се продолжи зашто тоа е последниот бастион на минатата влада, на СДСМ и на ДУИ и нема да има промени во нивното однесување. Ние влеговме во еден процес, па му дадовме шанса на случајот Кочани. Тоа беше една политичка дефанзива, но ако ја гледате објективната слика, треба да се смени менталниот склоп на тие луѓе таму. Не може да ви изгласаат интерпелација тие истите што ве избрале а вие да си продолжите да носите одлуки кои немаат врска со правото. Тоа говори за карактерот на тие луѓе, рече Мицкоски.
За локалните избори премиерот искоментира дека тоа што Костадин Костадинов нема да биде кандидат за градоначалник на Струмица ништо не менува во поглед на ВМРО-ДПМНЕ.
-ВМРО-ДПМНЕ ќе го даде името на следниот градоначалник на Струмица, рече Мицкоски.
Запрашан дали ќе му се промени ставот кон Вреди ако ДУИ освои повеќе гласови од нив рече:
-Јас сум убеден дека после развластувањето на ДУИ, следи процес на катарза во рамките на албанското гласачко тело. На следните локални избори ќе се види тоа и ќе победи политика спротивна од онаа на ДУИ. А политиката на ДУИ е купување трговски центри, скапи дуќани за ефтини пари во центарот на Скопје, формирање инстант фирми препознаени од инвеститорите и брзи тендери. Тоа беше политика со масовна депопулација во градови со мнозинство албанско население како Гостивар. Гостивар е еклатантен пример. Тоа е политика кога му се плукаше на системот во лице, се играше фудбалчиња, кошарка. Таа политика на локалните избори ќе биде поразена и ќе биде препознаена политиката на Вреди, смета Мицкоски.
