Често пати се чудам на аматерскиот однос кон суштинските и важни прашања  за граѓаните и за Македонија на Владата. И секогаш кога мислам дека го допреле дното, јас во суштина сум бил песимист, тие можеле да одат подлабоко”, рече претседателот на ВМРО-ДПМНЕ, Христијан Мицкоски одговарајќи на новинарско прашање поврзано со уставните измени.

Мицкоски додаде дека власта не само што го допрела дното туку дека оди и подлабоко.

„Прво, ги трошат парите на граѓаните ненаменски. Тие експерти добиваат пари од Буџетот за работа за која што во моментов немаат мандат. Тие можат да добијат мандат само во случај доколку Парламентот изгласа потреба за отворање на Уставот. Доколку Парламентот во првата фаза не изгласа, а што ќе  се случи, потреба за отворање на Уставот, тогаш нивната работа е беспредметна. И хонорарите кои што ги добиваат од вас граѓаните ќе бидат практично злоупотреба на финансиските средства на граѓаните бидејќи тие немаат сега мандат да зборуваат за уставни измени”, рече Мицкоски.

Тој го повика премиерот Димитар Ковачевски потребата од измени на Уставот да ја достават во Собранието и ако нема двотретинско мнозинство премиерот да поднесе оставка.

„Ја користам оваа прилика и го повикувам човекот кој што е поставен таму, Димитар Ковачевски, и вистинскиот којшто ја води Владата, Артан Груби заедно со Али Ахмети да ги достават овие барања во Парламентот, односно да ја достават потребата за отворање на Уставот за да можат пратениците да се изјаснат. Еве час поскоро, нели викаат континуирано од минатата година, помина една година, а ние слушаме е сега во септември имаме двотретинско мнозинство, помина септември, дојде октомври, е не до октомври туку до крај на година, па помина 2022 година, е не било до крај на година, било до февруари, помина февруари, сега викаа мај, еве го и мај поминува. Затоа ајде еве еднаш нека се охрабрат и нека го поднесат тоа барање и Али Ахмети и Димитар Ковачевски и да изгласаат пратениците, да видиме како ќе гласаат”, повика Мицкоски.

Тој посочи дека тогаш и можеби онаа оставка која што си ја поднесува и за која што зборува цело македонско Собрание Димитар Ковачевски, конечно да биде ефектуирана.

„Уставни измени под  овие услови во овој Парламент ќе нема”, дециден е Мицкоски.

Лидерот на ВМРО-ДПМНЕ рече и дека е против тоа Македонија да биде дефинирана како бинационална држава.

„Официјален јазик е македонскиот и има причина зошто за време на Рамковниот договор е дефиниран прагот 20 проценти“, рече Мицкоски.

Прашан за коментар за тврдењето на лидерот на Алијансата, Арбен Таравари дека додека разговарале, Мицкоски се согласил за замена на дефиницијата 20 проценти, со албанскиот јазик во Уставот, лидерот на ВМРО-ДПМНЕ рече дека ги демантира таквите тврдења.

„Го демантирам Таравари. Не сме разговарале на оваа тема, односно сме разговарале како дел од повеќе теми. Сме разговарале за Бадентер. До кога ќе живееме во општетство каде што малцинството ќе го владее мнозинството? Понатаму сме разговарале за правилото балансер. Тоа било поширок разговор за многу теми. До кога етничката припадност ќе е професија. Дали сакаме општетство каде што ќе се цени квалитетот. Да разговараме за општество каде работа ќе добиваат луѓето затоа што се квалитетни, а не оти се дел од некаков балансер. Ако сака некој да продолжиме да живееме во апархејд каде фрустрацијата на мнозинската заедница ќе биде се’ поголема и поголема, за тоа не можам да разговарам“, рече Мицкоски.

Тој додаде дека терминот „20 проценти“ во Уставот им овозможува и на другите заедници во Македонија да го користат својот јазик во општините во кои надминуваат 20 проценти, како што е бошњачката, српската, турската и ромската заедница.