Нови 13 жени го обвинија францускиот актер Жерар Депадје за сексуален напад или вознемирување, објави француската информативна веб-страница „Медиапарт“, а пренесе „Би-би-си“.

Жените тврдат дека актерот ги пипкал, ги ставал неговите раце во нивната долна облека и им кажувал непристојни коментари. Според нив, инцидентите се случиле во текот на изминатите две децении, на филмски и телевизиски сетови, но и на други јавни места.

Адвокатот на 74-годишниот Депардје изјави дека тој „формално ги негира сите обвиненија кои може да потпаднат под кривичното право“.

Овие обвиненија доаѓаат две години откако тој беше ставен под кривична истрага за силување, нешто што Депардје го негираше.

Во истрагата на „Медиапарт“, една статистка на филмски сет раскажа дека актерот ја ставил својата рака под нејзиниот фустан, обидувајќи се да дојде до нејзината долна облека. Кога му ја оттурнала раката, тој станал агресивен и повторно се обидел, тврди жената. Друга жена опиша дека актерот „ја фатил за половината“ за време на едно филмско снимање, при што со својата „залутана рака“ ѝ го допрел задникот. Трета жена, пак, раскажа дека тој во една прилика се обидел да „ја стави својата рака на нејзините гениталии“. Во друга прилика, во придружба на маж кој го претставил како продуцент, актерот, наводно, ја грабнал одзади и ѝ ги „триел колковите, стомакот и градите“.

Многу од жените изјавија дека биле шокирани што не било преземено нешто за време на филмските сетови, бидејќи наводното проблематично однесување на Депардје било толерирано, па дури и пречекувано со смеа.

„Возрасните му дозволија на актерот да ми ги допира градите пред сите“, изјави една актерка, која во моментот на сексуалниот напад имала само 17 години.

Во изјава за новинската агенција АФП, од Канцеларијата на париското обвинителство споделија дека „сѐ уште не добиле нова жалба“.

Депардје останува под истрага за наводно силување на актерка во 2018 година.