Метрополитен музејот на уметноста во Њујорк синоќа блесна во чест на црнечката историја, култура и стил, каде се случи традиционалната Мет гала. Дождот не го расипа расположението и гламурот на најважната модна вечер, каде дизајнери, модели и стилисти, рамо до рамо со ѕвезди од спортот, уметноста и забавата, се искачуваа по препознатливите скали, овојпат прекриени со син тепих, објави Си-ен-ен.

Годинашната тема, „Скроено за тебе“, беше инспирирана од изложбата на Институтот за костими „Суперфајн: Кроење на црнечкиот стил“, која ја раскажува историјата на црнечкиот денди-стил. Од Метрополитен музејот на уметноста објаснија дека темата секоја година има цел да „даде насока и поттикне креативна интерпретација“. Така беше и годинава – многу од гостите прикажаа современи верзии на т.н. „зут“ костими, модели со широки раменици и висок струк, популарни меѓу афроамериканските мажи во 1940-тите.

Во изјава за Си-ен-ен, пред неговото пристигнување на галата, модниот дизајнер Дапер Дан изјави дека „вистинскиот денди-стил“ започнал токму со зут-костимите, џезот и движењето на Харлемската ренесанса.

– Тоа беше моментот кога црнечките уметници и креативци почнаа да се облекуваат онака како што се чувствуваа – додаде тој.

Актерот Колман Доминго, пејачот Фарел Вилијамс, возачот на Формула 1 Луис Хамилтон, раперот Ејсап Роки и кошаркарот Леброн Џејмс беа поканети да бидат годинашните копретседавачи на настанот, заедно со главната уредничка на „Вог“, Ана Винтур.

Ова беше првата Мет гала со моден кодекс фокусиран на машката облека, што ги поттикна дизајнерите да ги преиспитаат традициите на кроење и да ги прилагодат за женскиот изглед. Црвениот тепих изобилуваше со впечатливи костими – од предимензионираното сако на Доџа Кет, потпишано од Марк Џејкобс, до широките реверни јакни што ги носеа актерката Теса Томпсон и раперката Доучи.

Џанел Моне фасцинираше со уникатен „костим во костим“ – долг капут испечатен да наликува на сако со вратоврска, комбиниран со шешир и монокл. Потоа го соблече капутот и откри црно-црвена креација од Том Браун, инспирирана од патување низ времето.

Мажите исто така прифатија впечатливи, театарски костими – актерот Реге-Жан Пејџ се појави целосно во црвено, Хенри Голдинг симболично се појави во златно, а музичарот Бед Бани во лежерен кафеав костим во две парчиња, комбиниран со традиционалната порториканска капа пава.

Некои гости темата ја искористија за да оддадат почит на значајни личности. Во првиот од своите два изгледи, актерот Колман Доминго пристигна во сина пелерина од „Валентино“, инспирирана од некогашниот уредник на „Вог“, Андре Леон Тали. Возачот на Формула 1 Луис Хамилтон, изјави дека неговите чевли од лакирана кожа се посвета на покојниот моден критичар, исто како и белата кошула и фустан од „Каролина Херера“ што ги носеше актерката Ен Хатавеј.

Други се инспирираа од луѓе блиски до нив. Ѕвездата од серијата „Мечката“, Ајо Едебири, за „Вог“ изјави дека нејзиниот изглед од „Ферагамо“ бил посветен на дендијата во нејзиниот живот, особено на нејзиниот татко. Фустанот од „Миу ниу“ на манекенката Џиџи Хадид беше инспириран од Зелда Вин Валдес, пионерка во црнечката мода која ги облекувала Џозефин Бејкер и Ела Фицџералд. Џоди Тарнер-Смит, пак, се инспирирала од јавачката Селина Лазевски.

И, секако, на сцената се појавија и самите легенди. Дајана Рос, која последен пат присуствувала на Мет гала во 2003 година, пристигна во фустан долг 5,5 метри и тежок 27 килограми, извезен со имињата на сите нејзини деца и внуци.

Пејачката Ријана вообичаено е најочекуваното име на Мет гала и таа секогаш последна пристигнува на овој гламурозен настан. Таа се појави во креација на Марк Џејкобс и ја искористи приликата за да го покаже својот труднички стомак и да ѝ соопшти на јавноста дека го очекува нејзиното трето дете со партнерот Ејсап Роки.