Во текот на последниот месец од 2024-та година, екипите на ЈП „Комунална хигиена“ подигнале и транспортирале приближно 1200 метри кубни непрописно исфрлено ѓубре од јавни и сообраќајни површини на територијата на градот Скопје. Најголем број диви депонии се отстранети во скопските општини Чаир, Ѓорче Петров и Аеродром.

Во текот на месецов, ЈП Комунална хигиена-Скопје бележи и голем број интервенции на таканаречените „црни точки“ каде што континуирано непрописно се одлага отпад, лоцирани на булеварот Никола Карев (Пластичарска улица) – во општината Чаир, улиците Ѓорче Петров, Лука Геров , Христо Батанџиев и Македонска војска – во општината Ѓорче Петров, улицата Васил Чакаларов – во општината Карпош и улицата Димо Хаџи Димов – во општината Кисела Вода – велат од претпријатието.

Оттаму додаваат дека наа овие локации секојдневно се реализираат и интервентни патролни дежурства од страна на Еко-патролата на „Комунална хигиена“, која во текот на  декември изготвила и врачила вкупно 29 едукативно-информативни записници за граѓани и правни субјекти што се затекнати при прекршување на Законот за јавна чистота.