Антикорупциската комисија денеска соопшти дека ќе го проверува случајот со јавното претпријатие „Водовод“ од Струга. Од ДКСК велат дека општината, предводена од градоначалникот Рамиз Мерко, пред две години го продала земјиштето и објектот во кој беше сместено ова комунално претпријатие и оттогаш струшки „Водовод“ за кирија месечно плаќа сума од над 3000 евра.

Според комисијата, ќе се испитуваат и кириите и продажбата на парцелата, но и судбината на музејоВ кој се наоѓа во близина.

Директорот на „Водовод“-Струга, Дашмир Насуфи, вели дека киријата и не е толку голема, со оглед на бројот на вработени. На седницата на општината неодамна тој се бранеше дека ја наследил кријата од неговиот претходник и дека правел напори тоа да се смени.

Но, за градските советници остана тајна каде завршуваат парите од кириите, кој е сопственик на објектот, каде освен Водовод е сместено и Јавното претпријатие за паркинзи „ЕКО Струга“, кое исто така плаќа висока закупнина.

Нејасна е и судбината на струшкиот Природонаучен музеј, кој исто така се наоѓа на атрактивно земјиште. Според шпекулациите во Струга, тој најверојатно ќе биде дислоциран, а на негово место ќе се гради „профитабилен проект“.