Германскиот канцелар Фридрих Мерц призна дека справувањето со економските предизвици се покажува како многу поголем предизвик отколку што првично очекувал.

„Го кажувам ова со самокритика – задачата е поголема отколку што некој можеше да замисли пред една година. Не сме само во период на економска слабост, туку сме во структурна криза на нашата економија“, рече Мерц во саботата за време на говорот во северниот германски град Оснабрик.

Податоците објавени во петок покажаа дека германската економија се намалила повеќе од првично проценетото во вториот квартал. Економската активност во Германија падна за 0,3 проценти во вториот квартал во споредба со претходните три месеци, пад што беше за 0,2 процентни поени посилен од прелиминарната проценка.

„Никој не треба да има повеќе илузии за тоа колку се длабоки и далекусежни предизвиците со кои се соочуваме“, им рече Мерц на членовите на неговата партија Христијанско-демократска унија (ЦДУ) во Долна Саксонија, покраината каде што е седиштето на производителот на автомобили „фолксваген“.

Тој го издвои падот од 36% на профитот по оданочување на „Фолксваген“ во вториот квартал како само „една од многуте пораки“.

„Големи делови од нашата економија повеќе не се конкурентни, а тоа е прашање на ценовна конкурентност“, предупреди Мерц, без да ги именува компаниите.

„Квалитетот е сè уште добар и раководителите на компанијата ги препознаваат овие предизвици. Но, фундаменталните услови во Германија едноставно не беа доволно добри во последната деценија“, додаде тој.

Американските царини – јасно е дека ќе бидат товар за Германија

Откако ја презеде функцијата оваа година, Мерц вети сеопфатни реформи насочени кон намалување на бирократијата, модернизирање на инфраструктурата и зголемување на домашната побарувачка. Неговата влада планира да инвестира стотици милијарди евра во патишта, мостови и вооружените сили за да ја зголеми продуктивноста.

Во саботата, тој ги истакна новите даночни олеснувања за деловните инвестиции и го повтори своето противење на зголемувањето на даноците за средните компании. Тој, исто така, призна дека американските царини од 15% за германскиот извоз ќе бидат товар за економијата, но предупреди дека отворената трговска војна со Вашингтон би можела да биде многу полоша.