Германскиот канцелар Фридрих Мерц денес беше критикуван поради одбивањето да се крене знамето на ЛГБТ+ заедницата над Бундестагот за време на претстојната Парада на гордоста во Берлин, објаснувајќи дека парламентот „не е циркуски шатор“.

Главното ЛГБТ+ здружение во земјата, телото одговорно за хомосексуалните прашања во германската влада, како и претставници од центарот и левицата, ја осудија изјавата на канцеларот.

Мерц ја бранеше одлуката на претседателката на Бундестагот.

„Тоа е правилна одлука. Бундестагот не е циркуски шатор, каде што можеме да креваме знамиња како што сакаме“, рече Мерц.

Оправдувајќи го своето одбивање, претседателката на Бундестагот, Јулија Клекнер, рече дека знамето веќе било развеано на 17 мај, Меѓународниот ден против хомофобијата.

Квир луѓето се „интегрален дел од нашето општество“ и виножитовото знаме над Бундестагот би било „силна посветеност на државата“ за нивна заштита, изјави Софи Кох, шефица на кабинетот на владата за хомосексуални прашања.

Главното ЛГБТ+ здружение нагласи дека знамето е „универзален симбол на различноста и човековите права“.

Левичарската опозиција, исто така, реагираше дека Мерц „има талент да прави гафови и да ги вознемирува луѓето“.

Портпаролот на германската влада, Себастијан Хиле, денеска изјави дека канцеларот „јасно ја нагласила важноста на Маршот на гордоста“.

Тоа е „важен настан за различноста“ и правата на ЛГБТ+ заедницата, изјави Хиле на прес-конференција.