Германскиот канцелар Фридрих Мерц денеска изјави дека тој, францускиот претседател Емануел Макрон и британскиот премиер Кир Стармер сакаат да разговараат со американскиот претседател Доналд Трамп пред тој да има телефонски разговор со неговиот руски колега Владимир Путин, најавен за утре.

Мерц го објави ова откако разговараше за ова прашање со американскиот државен секретар Марко Рубио на инаугуративна миса на папата Лав во Рим.

Тој изјавил дека е договорено четирите шефови на држави и влади од таканаречената „Коалиција на волјата“ повторно да разговараат пред телефонскиот разговор меѓу Трамп и Путин.

„Можеме само да се надеваме дека во таа прилика ќе биде постигнат понатамошен напредок“, додаде германскиот канцелар.

Американскиот претседател утре треба да разговара телефонски со својот руски колега, како што објави Трамп на својата социјална мрежа Truth Social во саботата.

Потоа ќе следи телефонски разговор со украинскиот претседател Володимир Зеленски, а потоа и со членките на НАТО.

„Се надевам дека ова ќе биде продуктивен ден, дека ќе има прекин на огнот и дека оваа многу насилна војна што никогаш не требаше да се случи ќе заврши. Бог да ги благослови сите“, напиша Трамп.