Сосема очекувано, мемоарите на Меланија Трамп предизвикаа големо внимание ширум светот, а особено во нејзината родна Словенија, каде поранешната прва дама на САД ги поминала своите детски и младешки денови.

Таа, меѓу другото, го опиша своето детство во Севница, Словенија и се присети како почнала да се занимава со манекенство кога имала само шест години.

Вели дека детството во Словенија и било среќно. Мајка ѝ Амалија израснала на фарма каде се одгледувал кромид, а подоцна работела и во фабрика, а татко ѝ Виктор бил продавач на автомобили. Меланија пишува дека нејзините родители ја однеле неа и сестра ѝ Инес на концертите на Елтон Џон и Тина Тарнер, за да се чувствуваат поповрзани со западните земји.

Но, Меланија се присети и на непријатните моменти од животот во поранешна Југославија, како што е упадот на УДБА во нивната куќа поради, како што вели, „сомнителниот начин“ на животот на нејзиниот татко. Таа нагласи дека нејзините соседи го кодошеле татко ѝ.

„Некој (сосед, колега или наводен пријател) го пријавил возниот парк на татко ѝ кај властите“, изјавил словенечки извор за британски „Дејли мејл“.

Во својата биографија, Меланија негира дека нејзиниот татко бил комунист, нагласувајќи дека комунизмот не ги одразува неговите политички убедувања.

„Неговото членство во Комунистичката партија беше задолжително бидејќи партијата воведе автоматска месечна членарина од дел од неговата плата“, се вели во книгата, како што пренесува „Дејли мејл“.

Изворот на споменатиот британски медиум претходно изјави дека членството на таткото на Меланија во Комунистичката партија на Југославија му донело бројни привилегии на семејството на поранешната прва дама. Тврди дека во градот имале посебен третман, а Виктор Кнавс заработувал многу подобро од останатите жители на Севница.

Како што пишуваат британските медиуми, повикувајќи се на тврдењата на лице кое тогаш живеело во Севница, за време на детството на Меланија само пет проценти од Словенците биле во Комунистичката партија иако нејзиниот татко јавно не ја истакнувал својата политичка припадност.

Меланија понатаму пишува дека нејзините родители не биле особено политички активни, иако преживеале значајни политички настани.

„Растејќи се чувствував повеќе поврзана со нашите соседи во Италија или Австрија отколку со комунистичките земји во Источна Европа“, продолжи Меланија.

„Скијав на Алпите и се одморав во Хрватска, на далматинскиот брег“, пишува таа и додава: „Навистина, моето детство беше исполнето со среќа, убавина и позитивност, далеку од типичната приказна за девојче кое расте во комунистичко општество“.