Борбата против корупцијата и напредокот кон европската интеграција немаат алтернатива, беше заклучено на средбата меѓу потпретседателот на Владата и министер за животна средина, Изет Меџити и амбасадорката на САД во Македонија, Анџела Агелер.

Како што објави Меџити на Фејсбук, тие разговарале за продлабочување на стратешкото партнерство меѓу двете земји, континуираната поддршка на САД за реформите во правосудството и нашите непоколебливи напори во борбата против корупцијата и организираниот криминал.

„Ја повторив посветеноста на Владата на процесот на европска интеграција и важноста на тесната соработка во рамките на НАТО, како гаранција за безбедноста, стабилноста и развојот.

Разговаравме и за големи инфраструктурни проекти, вклучувајќи ја изградбата на Коридорите 8 и 10д, кои се од суштинско значење за економскиот раст и одржливата регионална поврзаност“ напиша Меџити на Фејсбук.