Во првата половина од 2025 година, туристичките сместувачки капацитети низ Европската Унија регистрирале вкупно 1,279 милијарди ноќевања, што претставува раст од 2,3 проценти во споредба со истиот период минатата година (1,249 милијарди ноќевања). Овие податоци ги објави Европската статистичка служба – Евростат- пренесе Каматица.

Најголемо зголемување на вкупниот број ноќевања во првите шест месеци од оваа година во споредба со 2024 година е забележано во следните земји: Малта (+12,7 проценти), Латвија (+8,6 проценти) и Полска (+8,5 проценти). Во исто време, Ирска беше единствената што забележа пад (-3,5 проценти), додека најмал раст пријавија Германија (+0,2 проценти), Шведска (+0,5 проценти) и Белгија (+0,9 проценти).
Странските посетители (нерезиденти на земјата, вклучувајќи ги посетителите од земјите од ЕУ и земјите надвор од ЕУ) сочинуваат речиси половина (48 проценти) од сите ноќевања во првата половина од 2025 година. Постојат големи разлики меѓу земјите-членки. Најголем дел од странските ноќевања на почетокот на годината е забележан во медитеранските земји, Малта (93,6 проценти), Кипар (93,1 проценти) и Хрватска (87,6 проценти)

Спротивно на тоа, странските гости сочинуваат помалку од една петтина од ноќевањата во Германија (18,5 проценти), Полска (19,2 проценти) и Романија (20,2 проценти).

Растот на ноќевањата од страна на странските посетители беше поизразен (+3,1 процент) во споредба со растот на домашните ноќевања (+1,7 проценти). Најголем раст на ноќевањата од странски посетители е забележан во Малта (+13 проценти), Латвија (+12,8 проценти) и Финска (+12,3 проценти). Единствените земји што доживеале намалување на бројот на ноќевања од странски посетители биле Ирска (-6,1 проценти), Шведска (-5,3 проценти) и Германија (-2,9 проценти).