На медицинските сестри од Клиничката болница Тетово, кои протестираа една недела, ќе им бидат продолжени договорите за работа до декември.
Сепак, тие велат дека не ги добиле редовните решенија за работа што ги бараат. Денеска директорот на болницата ги информираше дека ова е привремено решение. Медицинските сестри се незадоволни и најавуваат дека ќе продолжат да бараат решенија за редовно вработување, јави ТВ „21“.

„Едно од нашите барања беше да добиеме решенија за работа, а другото беше исплата на неисплатените плати. Исто така, да имаме договор на дело за да не работиме без плата. Едно од барањата беше прифатено од институцијата во која работиме, односно директорот не информира дека договорите ќе ни бидат продолжени до декември. Сепак, за првото и најважното барање треба да се обратиме до Министерството за здравство, за Министерството да поднесе барање и молба за одобрување на решенијата“, вели Фљутура Ислами, медицинска сестра во тетовската болница.

139 медицински сестри и технички персонал од Клиничката болница Тетово една недела протестираа поради неплаќање на платите и поради нивниот работен статус. Тие денеска изјавија дека доколку не се најде решение за нивниот статус, протестите ќе ги продолжат во Скопје пред Министерството за здравство.