Кандидатот за градоначалник на Скопје од Левица, Амар Мециновиќ, денеска истакна дека Вардариште не може да се претвори во парк или простор за прошетки, поради долгогодишното загадување и контаминација на земјата и подземните води.

„Вардариште е депонија што повеќе од половина век труе и загадува, а неконтролираните палења од луѓе на маргините на општеството го влошуваат ризикот по здравјето на граѓаните“, изјави Мециновиќ.

Тој потсети дека депонијата е почната уште во 1970 година, а официјално оформена во 1980 година, додека 2017 беше прогласена за затворена, но сè уште се користи како претоварна станица.

Левица предлага долгорочно и одговорно решение: забрана за пристап, пренесување на сите остатоци во официјални регионални депонии, долгорочно позеленување, техничка анализа за биогасна централа, целосна примена на студијата за Вардариште од 2014 година и можност за изградба на фабрички центар за рециклирање на отпад.

„Вардариште е тест за одговорноста на институциите, но и на сите нас кои не смееме да им довериме мандат на оние кои веќе имале многу можности да постапат во интерес на здравјето на скопјани“, порача Мециновиќ.