Маж предизвикал инцидент пред комплексот на Кабинетот на претседателот на Хрватска, каде што во претпладневните часови вербално се судрил со обезбедувањето, а наводно се обидел и неовластено да влезе во комплексот, објави Јутарњи лист.

На крајот била повикана полицијата, која го привела на криминалистичка истрага. Според неофицијални информации, станува збор за 67-годишен маж од загрепското подрачје, кој се обидел да влезе во комплексот подигнувајќи ја рампата. Кога обезбедувачите го запреле, тој почнал несвесно да зборува, меѓу другото велејќи дека во автомобилот со кој дошол до комплексот, паркиран во близина, има бомба.

Поради ова обезбедувањето повикало полиција, која набргу пристигнала и го привела. При претрес на автомобилот, за среќа, било утврдено дека мажот празно се заканувал, односно не била пронајдена никаква бомба, експлозив или оружје. Полицијата го однвела на криминалистичка истрага за да се утврди дали во неговото постапување има елементи на кривично дело или прекршок, а ќе се обиде да ги утврди и причините за таквото однесување.

Од Кабинетот на претседателот го потврдиле инцидентот.

„По повик на припадниците на Почесно-заштитната бригада, која го обезбедува комплексот на Кабинетот на претседателот на Републиката, припадници на МВР денеска постапувале на улицата Пантовчак и притоа привеле лице кое на неправилен начин се обидело да влезе во комплексот. Кабинетот на претседателот ја поздравува брзата реакција на припадниците на ПЗБ и МВР и професионалното постапување на воените и полициските службеници. За појаснување на околностите и деталите од интервенцијата, упатуваме до МВР кое ја води понатамошната истрага. Ниеден од вработените или од функционерите на Кабинетот на претседателот не бил загрозен на кој било начин“, соопшти Кабинетот.

Иако досега никогаш не бил забележан сличен инцидент, односно обид за насилен влез во државен објект од највисоко ниво на заштита, изминативе години полицијата и Државното обвинителство процесуирале низа закани против највисоките државни функционери.

Сепак, најчесто станувало збор за вербални закани преку социјалните мрежи или за закани по е-пошта. Исклучок е, секако, вооружениот напад на Даниел Безук во 2020 година врз зградата на Владата и Собранието, кога беше тешко ранет полицаец.