Најбогатиот човек на светот го прифати предизвикот да се тепа со лидерот на своевремено најбогатата земја во Јужна Америка, иако Илон Маск и Николас Мадуро поверојатно ќе си удираат тупаници преку телевизиите и социјалните мрежи отколку директно во брада или во плексуз.

Мадуро прв го предизвика Маск на „мачистички“ дуел, откако милијардерот не штедеше критики за режимот во Венецуела и за изборната измама. Во пресметката со навреди и закани, Маск го нарече Мадуро „диктатор“, а венецуелскиот лидер му одговори со рафал: „Тој претставува фашистичка идеологија, која е против природата и против општеството“, но не запре.

– Сакаш тепачка? Ајде. Илон Маск, јас сум спремен. Јас сум син на Боливар и на Чавес. Не ти се плашам Илон Маск. Ајде да се тепаме, каде и да сакаш. Да речеме во Каракас во предградијата. Ако ти сакаш, и јас сакам. Кажи каде – изјавил Мадуро на националната телевизија.

Педесет и тригодишниот Маск, кој лани закажа тепачка и со колегата-милијардер Марк Закерберг, итно го прифатил предизвикот од 61-годишниот диктатор.

– Прифаќам. Ќе избега како пиле. Еве, ако победам, повеќе да не биде диктатор на Венецуела. Ако победи, ќе му дадам бесплатен билет до Марс – објави Маск, кој е сопственик и на компанијата за вселенски истражувања „Спејс икс“.

Длабоко „влезен во филмот“, Маск веднаш направи анализа на своите противници, со кои тешко дека некогаш ќе ги вкрсти ракавиците.

– Мадуро е голем и веројатно знае како да се тепа, па тоа би било вистинска борба. Зак е мал тип, па тоа ќе биде кратка борба, ха-ха-ха – порача Маск.

Ваквата вербална пресметка може да му ја крене популарноста на човекот со најмногу следбеници на неговата социјална мрежа и со богатство проценето на 240 милијарди долари, но нема да придонесе за надминување на хаосот во Венецуела, каде што опозицијата тврди дека Мадуро ги фалсификувал претседателските избори и тоа со огромна измама.

Опозицијата тврди дека нејзиниот кандидат освоил најмалку 70 отсто од гласовите, а Изборниот совет, близок до режимот во Каракас, неофицијално го прогласи Мадуро за победник со 51 отсто од гласовите. Четири дена по дигиталното гласање, сѐ уште се чека на „загубените“ кутии со ливчињата отпечатени од гласачките машини. Јавниот обвинител ја префрли одговорноста за доцнењето на резултатите врз „хакерски напад од Северна Македонија“, но не го поткрепи тврдењето со каков било аргумент.

– Да не е ситуацијата во Венецуела трагична, би била смешна. Режимот ја обвинува Северна Македонија дека ги хакирала изборите. Мадуро на телевизија го предизвикува Илон Маск на тепачка. Режимот вели дека не може да ги пронајде гласачките ливчиња три дена. Се надевам дека оваа трагикомедија е пред крајот – објави на Икс опозициската пратеничка Марија Елвира Салазар.