Членовите на бандата „Варф Џереми“ во пристаништето Сит Солеј на Хаити убиле најмалку 207 луѓе на почетокот на месецот, соопштија денеска Обединетите нации, ревидирајќи го бројот на жртви од првичната проценка од 187.

Во новиот извештај за масакрот, Канцеларијата на Високиот комесаријат за човекови права на ОН соопшти дека околу 300 членови на бандата Варф Џереми убиле најмалку 134 мажи и 73 жени, повеќето од нив постари жители обвинети за вештерство, за помалку од една недела со масовни егзекуции, киднапирања и насилни упади, објави „Ројтерс“.

Водачот на бандата Монел „Микано“ Феликс ги наредил нападите откако на неговото дете му се слошило, обвинувајќи ги локалните жители дека ја предизвикале болеста преку магија.

Многу од жртвите биле киднапирани од вуду храмовите, соопштија ОН.

Бандата на Микан контролира мала, но стратешка област помеѓу клучните пристаништа, околните магацини и националните автопати надвор од главниот град околу 15 години, според ОН.

По убиствата, членовите на бандата се обиделе да ги избришат доказите со одземање мобилни телефони, палење и фрлање тела во морето, според „Ројтерс“.