Директорката на Институтот за јавно здравје доктор Марија Андоновска денеска на прес-конференција истакна дека постојат сомнежи за извршена диверзија во оваа клучна здравствена установа, поточно, дека постои сомнеж дека некој намерно ги спуштил осигурувачите во разводните табли на одделението за бактериологија, па така фрижидерите во кои се чуваат реагенси за сите заразни и незаразни заболувања во државата – биле исклучени неколку часови вчера.

Ова се случува само 5 дена откако Андоновска е назначена за директорка и откако таа алармираше дека претходното раководство не набавило реагенси за голема кашлица, во време кога во Скопје е прогласена епидемија на пертусис.

-Вчера после работното време бев известена од дел од вработените дека не функционираат фрижидерите на бактериологија. Се работи за 1 фрижидер и една комора каде се чуваат значајни реагенси за детектирање на заболувања. Кога дојдовме да провериме, сфативме дека фрижидерот и комората се директно исклучени од бушони.

Во тој дел во ходникот поминуваат сите вработени што работат во тој дел. Ако не го детектиравме ова навремено, ќе имаше голема финансиска штета и општа опасност за животот и здравјето на граѓаните бидејќи ќе немавме реагенси за детектирање заболувања.

Двете разводни табли имаат стотици осигурувачи, а спуштени беа само тие што водат до фрижидерот, рече директорката Андоновска.

Инаку во Институтот за јавно здравје има истражители од обвинителството. Кога бевме да го фотографираме делот каде се наоѓа спорниот фрижидер и комора (целосна просторија во која се чуваат реагенсите), дел од вработените негодуваа кај раководителката што директорката ги пуштила камерите да снимаат и ја прашуваа раководителката зошто не ги заштити.

Во меѓувреме директорката Андоновска вели дека денеска се проверуваат сите реагенси зашто не може да се знае колку време фрижидерите биле исклучени, па следствено денеска мора да се провери и квалитетот на реагенсите.

Се работи за голем број реагенси, меѓу кои и оние за голема кашлица, а кои Андоновска ги обезбедила токму вчера, по пат на донација и биле сместени во фрижидерот и комората.

Сериозна диверзија во ИЈЗ: Вчера некој ги исклучил фрижидерите во кои се чуваат реагенси за цела Македонија