Манчевски: Трошоците на функционерите ги намаливме за 60 отсто
Во овие три години покажавме одговорност кон парите на граѓаните, а трошоците на избраните и именувани функционери се значително намалени, истакна меѓудругото Дамјан Манчевски, потпретседател на СДСМ и пратеник во Собранието, во вечерашното гостување на „Топ Тема“ на ТВ Телма.
Препорачано
– Во СДСМ започнавме сериозна реформа што ја нарековме одвојување на партијата од државата и воведовме серија на ограничувања за избраните и именувани функционери, во однос на користење на службени возила, надоместоци за комисии и слично кои во 2016 година беа огромни за разлика од сега кога се спуштени за 60 отсто, порача Манчевски.
Тој додаде дека популистичките предлози кои доаѓаат од дел од пратениците на ВМРО-ДПМНЕ нема да направат никаква суштинска разлика и граѓаните од нив нема да видат конкретни придобивки.
– Популистички предлози нема да помогнат на граѓаните. Ајде да ги поддржиме реформите кои ги почнавме и со кои намаливме над 60 отсто од трошоците за функционерите, порача потпретседателот на владеачката партија, Манчевски.
Манчевски истакна дека правото на протест е легитимно за секој граѓанин, за секоја опозиција, но протестите што овој период ги прави ВМРО-ДПМНЕ се само за внатрешна употреба на раководството на партијата.
– Пред два месеца имавме избори и само што го конституиравме новиот собраниски состав. Мислам дека овие протести се само за внатрешна употреба во ВМРО-ДПМНЕ. Раководството на партијата е јавно изложено со барања за промени и конгрес и нормално е тоа. По секои избори, особено по изборен пораз, да барате доверба од членството. Последниот протест им беше најавен како борба против сиромаштија, а протестира со луксузни автомобили. Тоа е она што ВМРО-ДПМНЕ не може да го сокрие, масовното богатење на нивни партиски фукционери. Таквиот протест беше ексклузивен партиски настан на раководството на ВМРО-ДПМНЕ, нагласи Манчевски.
Потпретседателот на СДСМ, Манчевски посочи дека деструктивното однесување на ВМРО-ДПМНЕ продолжува и во Собранието.
– ВМРО-ДПМНЕ денеска во Собранието сакаше да блокира избор на работните тела заради барање за Одлука за формирање на комисиите, иако претходно на координација сте се согласиле со истата одлука и при тоа што е најинтересно, немавме никаков алтернативен предлог, тоа беше само обид за блокада на Собранието, заклучи Манчевски.
