Таа е мајка хероина којашто за многу краток временски период два пати предвремено се породи со царски рез! Модната дизајнерка Маја Кикириткова во емисијата „Мамавизија“ си ја отвори душата за нејзините тешки денови во бременоста, породувањето и првите денови откако станала мајка, за кои не замислувала дека ќе бидат такви.

И покрај уредната прва бременост, неколку недели пред породувањето почнала ненадејно да крвави, докторот ѝ кажал дека мора да се породи.

-Му велев, како да го вадиме бебето, има уште време додека да се породам. Не ми беше јасно дека поради тоа што ми се одлепила плацентата сум крвавела обилно, тоа претставува голем ризик и за бебето и за мајката. Ме породија со царски рез многу брзо, но син ми Лазар го задржаа во болница – вели таа.

 

Кикириткова наместо мајчинска радост почувствувала голема тага и болка. По неколку дена во болница на нејзиниот роденден (27 декември) ја отпуштиле, но како што вели, со празни раце.

-Сите заминуваа од болница со транспортерите со бебиња, само ние со празни раце. Тоа ми беше најтажниот роденден. Лазар го задржаа уште некое време во болница. Пред полноќ за дочек на Нова година отидовме пред инкубатор да „славиме“ со нашето дете – раскажува таа.

Откако си го зеле бебето дома вложувале многу за тој да пркне и првите месеци давале сè себе за тој да се изедначи со врсниците. Во тој период не помислувала за втора бременост.

-Докторот ми рече дека имам затнување на десниот јајцевод и дека сега е тешко да останам повторно бремена. Тој ми рече да помине малку време да направам операција, па да се обидуваме за второ. И така само што се реализирав како мајка, не ни планирав одново да раѓам. Но, се случи она неочекуваното, останав бремена. Кога направив тест и ми беше позитивен, му се јавив лута на д-р Тофоски, имаме близок однос и си дозволив дури и да повишам тон: „Па, нели нема шанси да останам сега бремена. Јас не го сакам ова дете“. Така викав тогаш, бесна и лута на телефон, а тој ме смируваше: Немој така Маја, тоа е божји дар, не се вика така, некој не може да има деца“ – раскажува таа.

Кикириткова се плашела дека и со втората бременост со ќерката Ева ќе ѝ се случи истото и за жал, била во право. По две години, во истата гестациска недела повторно отцепување на плацентата, одново обилно крварење, одново ппредвремено породување…

Целата емисија „Мамавизија“ со оваа храбра мајка и нејзините суперхеројчиња  можете да ја погледнете на јутјуб-каналот на „Слободен печат“.

Водителка и авторка на емисијата е Александра Вуксановиќ.