Неколку илјади мировници треба да бидат распоредени во Украина, изјави францускиот претседател Емануел Макрон во интервју за весникот „Паризиен“.

– Клучниот елемент е да има војници во Украина… Може да има неколку илјади, но не и стотици илјади. Не е прашање на бројка … Пред се, ние сме тука да се солидаризираме – рече Макрон.

Според него, задача на мировниците во Украина би била да ги поддржат резервните сили во воздух или на стратешки позиции, далеку од линијата на фронтот.

Макрон, коментирајќи го предлогот на рускиот претседател Владимир Путин за почеток на директни преговори со Украина во Турција на 15 мај, рече дека, според него, тоа е недоволен чекор.

– На безусловен прекин на огнот не му претходат преговори – рече тој, а пренесе Франс 24.
На 10 мај, четворица европски лидери го посетија Киев – Макрон, полскиот и британскиот премиер Доналд Туск и Кир Стармер и германскиот канцелар Фридрих Мерц.

Макрон веќе неколку месеци ја развива идејата за испраќање мировници заедно со британскиот премиер Кир Стармер.

И покрај создавањето на „Коалицијата на подготвените“ – коалиција на држави кои ја поддржуваат Украина во нејзиниот конфликт со Русија – Макрон и Стармер се соочија со неподготвеност од другите европски земји да распоредат трупи таму без гаранции за поддршка од САД.

Руската страна повеќепати го нарече неприфатливо присуството на војници на Северноатлантската алијанса на територијата на Украина.

Според официјалниот претставник на руското Министерство за надворешни работи, Марија Захарова, секое странско воено присуство во Украина ќе се смета за закана за Русија и може да доведе до конфликт.