Францускиот претседател Емануел Макрон и германската канцеларка Ангела Меркел денеска изјавија дека очекуваат владите на САД и Данска да дадат објаснувања во врска со обвинувањата за шпионажа од страна на Вашингтон кон европските сојузници со помош на Копенхаген.

– Ова не е прифатливо меѓу сојузниците, а уште помалку меѓу сојузниците и европските партнери, истакна Макрон, а Маркел додаде дека се согласува со коментарите на францускиот лидер.

– Систематското прислушување на блиските сојузници е неприфатливо, изјави за ДПА министерката за одбрана на Данска, Трине Брамсен.

Портпаролот на германската Влада, Штефен Зајберт во Берлин изјави дека германските власти се во контакт со сите релевантни национални и меѓународни тела за расветлување на случајот. Истражувачките новинари од данската телевизија ДР, заедно со германските медиуми како ГДР, ВДР и Зидојче цајтунг, објавија дека Националната агенција за безбедност на САД шпионирала европски политичари со данска помош.

Истражувањето беше засновано на анонимни извори и внатрешна анализа на данската воена разузнавачка служба ФЕ од 2012 и 2014 година. Истрагата го откри обемот на наводната воено-разузнавачка соработка меѓу Данска и САД и го прошири списокот со имиња на политичари.

Брамсен додаде дека не може да коментира шпекулации за можна разузнавачка активност. ФЕ исто така не ги коментираше наводите.