Младата репрезентација на Македонија до 21 година во Скопје официјално ги започна подготовките во пресрет на силниот контролен турнир што ќе се одржи во Хрватска.

Покрај нашата селекција, учество ќе земат и репрезентациите на Албанија, Саудиска Арабија и домаќинот Хрватска. Место на одигрување на контролните натпреварите ќе биде Свети Мартин на Мура.

Нашите млади репрезентативци вчера на тренинг центарот „Петар Милошевски” официјално го одработија првиот тренинг, остануваат уште два пред заминувањето за Хрватска.

Селекторот на У21 селекцијата, Драги Канатларовски не го крие задоволството што Македонија ќе има прилика да учествува на еден силен меѓународен турнир каде што учество ќе земат и квалитетни селекции како Хрватска, Албанија и Саудиска Арабија.

– По консултациите со мојот тимот за одигрување на што поголем број контролни натпревари, сè со цел што подобро да се подготвиме за квалификациите што нè очекуваат во март, можам да изразам задоволство што ќе учествуваме на еден ваков силен турнир во Хрватска. Ова е наш втор собир, првиот собир на оваа генерација беше во јуни каде што одлично стартувавме, забележавме две победи над Босна и Херцеговина. Се надевам дека во ист ритам ќе продолжиме, со квалитетна игра, голема пожртвуваност и желба за победа. Од натпревар во натпревар ќе се обидеме да ја подобриме нашата играта и да растеме и напредуваме заедно како тим. Вредно и напорно работиме, се трудиме сите заедно максимално на секој тренинг. Ме радува фактот што ги имаме сите играчи на располагање, во Хрватска ќе ни се придружи и Кристијан Тасевски. Оваа репрезентација поседува квалитет и знаење, се надевам дека ќе ја продолжиме победничката низа – вели Канатларовски.

Првиот натпревар ќе го играме против Албанија на 23 септември, а три дена подоцна силите ќе ги одмериме со селекцијата на Саудиска Арабија.