Денеска од 18.00 часот во СЦ „Јане Сандански“ – Скопје најдобрата македонска машка ракометна репрезентација против Литванија ќе го игра последниот натпревар од квалификациите за Европското првенство 2026.

Ова е решавачки меч за избраниците на селекторот Кирил Лазаров во кој ќе одат на победа со најмалку два голови разлика (или повеќе) за да го обезбедат второто место во квалификациската група 1 кое исто така води директно на ЕП.

Првиот меч меѓу овие две селекции заврши со триумф на Литванците (29:27). Од претходно репрезентацијата на Словенија веќе обезбеди пласман на ЕП.

И со минимална победа од еден гол разлика Македонија би имала добри шанси да се најде меѓу најдобрите третопласирани репрезентации за учество на континенталниот собир.

Судии на денешниот дуел во Скопје ќе бидат Руд Гераетс и Пол Гераетс од Холандија, додека ЕХФ делегат е Герхард Реисинер од Австрија.