Женската одбојкарска сениорска репрезентација на Македонија го запиша и вториот пораз во ЦЕВ Европската Сребрена лига 2025 откако вечерва со 3:0 (25:12, 25:12, 25:20) загуби од Австрија, на вториот натпревар од вториот турнир, чии домаќин се Фарски Острови.

Австрија важеше за фаворит пред натпреварот, со оглед на тоа дека е добро познат противник за нас, со кој се соочуваме и во евро-квалификациите, а таквата улога ја потврди и на теренот.

Нашите одбојкарки најголем отпор понудија во третиот сет, а најефикасни во тимот беа Теа Терзиевска со седум поени и Тамара Стојанова со пет, додека Симона Стојаноска и Добрина Хаџи Тосева имаа по три поени.

Македонија по четири одиграни натпревари има скор од две победи над Луксембург и Фарски Острови и два порази од фаворитите за освојување на ЦЕВ Европската Сребрена лига 2025, Швајцарија и Австрија.

Последниот турнир од годинешното издание македонските репрезентативки го играат во Струмица, следниот викенд од 13 до 15 јуни, кога се соочуваат со Израел и Грузија.