Христијан Симоновски донесе бронзен медал за Македонија на Мулти европските игри кои се одржаа во Ниш, Србија, во салата „Чаир“, а воедно освои и квота за Европското првенство до 21 година.

Овој турнир е еден од најголемите настани некогаш организирани на европскиот континент, организиран од Европската таеквондо унија и таеквондо клубот „Астерикс“ од Ниш, со повеќе од 2000 учесници.

Ваквите турнири носат двојни бодови и квалификациски квоти, што го прави еден од најважните настани во европскиот календар. Натпреварувачите ќе се борат за место на претстојните европски и светски првенства, а голем број национални тимови ги доведоа своите најдобри тимови за да освојат вредни бодови.

Во јуниорска конкуренција Симоновски во својата категорија до 63 килограми на стартот оствари триумф над Росарио Чинтура од Италија (2:0), па следува победа над Ефе Ибрахим Дузел од Турција (2:1).

Во четвртфиналето Симоновски го совлада Самет Арда Ероглу од Турција (2:1), а во полуфиналето со 2:0 загуби од турскиот таеквондист Уткан Таха Караман (2:0).