Репрезентативецот на Македонија, Тихомир Костадинов доживеа тешка повреда настапувајќи за својот Пјаст Гливице во полскиот шампионат.

Клупскиот лекар потврди дека нашиот играч кој е стандарден во редовите на селекторот Благоја Милевски, ќе паузира половина година.

Тихомир Костадинов се повреди во 75 минута од натпреварот со Ленчна без да оствари контакт со својот ривал. Првите дијагнози објавија кинење на вкрстените лигаменти на десното колено, што беше потврдено со тестови.

– Тихо се подготвува за операција следната недела. По операцијата ќе оди на рехабилитација и минимум шест месеци пауза – вели клупскиот лекар од Пјаст Гливице.

Сезонава во најсилното полско првенство нашиот 26-годишен играч од средниот ред запиша само шест настапи.

Следните обврски А репрезентацијата ќе ги има во Лигата на нации, во рамкиет од Лигата „Ц“ во јуни ќе одигра четири натпревари. На 2 јуни на гости против Бугарија, па три дена подоцна му гостуваме на Гибралтар. На 9 јуни ќе ја пречекаме Грузија, а на 12 јуни во Скопје ќе дојде селекцијата на Гибралтар.