Васил Зафирчев е роден на 28 февруари 1980 година во Велес и е еден од најистакнатите актери кај нас, кој има богато портфолио и многубројни театарски улоги зад себе. Тој е театарски и филмски актер, музичар и водител. Сепак, на публиката ѝ легна при срце со улогата на готвачот Марио од хит-серијата „Преспав“.

Васил Зафирчев дипломирал во 2002 година на Факултетот за драмски уметности во Скопје. Веднаш потоа, почнал да настапува во повеќе театри низ Македонија, како Македонскиот народен театар, Драмскиот Театар, народните театри во Велес, Прилеп и Струмица и Македонската Опера и Балет.

Со само 33 години, Зафирчев остварил повеќе од 60 улоги во театар, телевизија и на филм. Добитник е на сите престижни актерски награди во Македонија, меѓу кои и на највисокото глумечко признание „Ристо Шишков“, како и на повеќе меѓународни театарски награди.

Од 2004-2006 година Зафирчев бил Претседател на Здружението на драмски уметници на Република Македонија – „Џинот“. Од 2004 година станал уметнички директор на „Калиопи Мјузик продукција“. Од 2006-2007 година Зафирчев бил професор при Славјанскиот Универзитет во Битола. Од 2006-2007 година бил професор по актерска игра во средното балетско училиште „Илија Николовски – Луј“ во Скопје. Од 2006 до 2008 година бил вработен во Националната установа Драмски Театар, Скопје. Денес, Васил Зафирчев е уметнички директор на Театарот „ЈХК-Џинот“ од Велес.