Македонија е една од петте европски земји во кои на барање на шпанските, германските и финските власти, Еуроџаст и Европол учествуваа во акција против огромна известициска измама, вклучувајќи и употреба на криптовалути. Како што е објавено на интернет страницата на Еуроџаст, се проценува дека жртви на оваа огромна онлајн измама се стотици илјади луѓе.

Акцијата била спроведена на 8 и 9 ноември во Албанија, Бугарија, Грузија, Северна Македонија и Украина, при што со истрагата биле опфатени 15 кол центри, а уапсени биле петмина осомничени, четворица во Албанија и еден во Грузија. Од овие 15 кол центри 1 е во Македонија, 6 во Албанија, 5 во Грузија и 3 во Украина, а освен нив истрагата вклучувала и 27 други локации и 5 возила.

Во текот на акцијата биле извршени околу 50 сослушувања на осомничени и сведоци, а запленети се над 500 компјутери, лаптопи, УСБ-а и хард дискови), над 340.000 евра готовина, неколку мобилни телефони, неколку банкарски сметки, крипто-паричници, лични карти, банкарски картички и стотици други документи.

Од Еуроџаст објаснуваат дека осомничените припаѓале на организирана криминална група за која се верува дека била вклучена во инвестициска измама, користејќи криптовалути. Криминалната мрежа, за измамата користела десетици кол центри во неколку земји и стотици облајн платформи. Осомничените се претставувале како брокери кои требало да им помогнат на инвеститорите да заработат големи суми пари со мали инвестиции. Организираните криминални групи ја здобивале довербата на жртвите онлајн и преку професионално отворени кол центри или други модели на таканаречен социјален инженеринг. Тоа било доволно охрабрување на жртвите да инвестираат преку веб платформи контролирани од криминална организација што резултирало со губење големи суми пари.

Во акцијата во Македонија, според објавата на Еуроџаст, биле вклучени Основното јавно обвинителство за гонење организиран криминал и корупција и МВР, односно еден обвинител и 28 полициски службеници.