Во туристичкиот комплекс во село Семетеш, во соседна Србија, од 27 до 31 јули ќе се одржи 12. Меѓународна стрип-колонија „Рашка 2024“, каде преку Стрип-центарот на Македонија – Велес ќе присуствуваат Ангела Петрушевска, млада и талентирана стрип-авторка од Скопје, и Томе Трајков, програмски координатор на Центарот.

На стрип-колонијата ќе учествуваат и млади од стрип-училиштата од Србија – од Ваљево, Рашка, Лесковац, Белград, Сомбор и од Крагуевац.

Томе Трајков го истакнува повеќегодишното учество на македонски автори на оваа стрип-колонија, коешто датира од 2015 година, а со што се продолжува повеќегодишната успешна соработка помеѓу Стрип-центарот на Македонија со седиште во Велес и Клубот на ликовни уметници „Рашка школа“, Канцеларијата за млади и центарот за култура „Градац“ од Рашка. Македонија е единствена поканета земја надвор од српското јазично подрачје.

Како што појасни тој, треба да се направи паралела помеѓу стрип-колонијата во Рашка, Србија, и таа во Велес, којашто е дел од Интернационалниот стрип-салон, најзначајниот стрип-настан во Македонија.

Конкретно, Стрип-колонијата во Велес почна да се организира од 2018 година. Разликата помеѓу овие две стрип-колонии е што учесниците таму не се обврзани да ги завршат стриповите, како што е случајот во Велес. Но, на колонијата во Рашка се организираат предавања, промоции, менторска поддршка и слично, објаснува Трајков.