Македонската поетеса, писателка, есеистка, преведувачка, филолог и антрополог, Наташа Сарџоска, на покана на Хрватскиот ПЕН Центар во текот на ноември гостуваше на книжевна резиденција во Загреб.

Во рамките на својот престој, на 20 ноември таа гостуваше и на поетски настан во Италија, во градот Гориција, заедно со словенечката поетеса Петра Коршиќ и италијанскиот поет Перикле Камуфо, како и музичарите Сандро Карта и Мартин Олафлин, каде што читаше свои стихови на македонски и на италијански јазик во рамки на книжевната манифестација „Фаре Вочи – Гориција а Капо“.

Освен тоа, во текот на својата резиденција таа учествуваше на книжевна трибина на тема „Читањето, пишувањето и преведувањето поезија го прошируваат нашиот свет“, која ја модерираше хрватската литературна теоретичарка, критичарка и есеистка Марија От Франолиќ во Градската библиотека „Марија Јуриќ Загорка“ во Загреб.

Разговорот се водеше на хрватски јазик, а на оваа книжевна средба присуствуваа и претставници од Заедницата на Македонците во Хрватска.

Сарџоска досега има објавено шест поетски книги и два романа, како и повеќе од педесет литературни преводи на македонски јазик. Нејзините дела се преведени на повеќе од дваесет светски јазици. Таа работи како професор на Меѓународниот универзитет „Шилер“ во Германија.

(Текстот е објавен во „Културен печат“ број 258, во печатеното издание на весникот „Слободен печат“ на 30.11.-01.12.2024)