На иницијатива на словенечката и македонската Асоцијација на кинематографери, од 18 до 22 јануари во Кинотека на Словенија во Љубљана, се одржа третото издание на Фестивалот „БалКам“ (Балканска камера), на кој се прикажуваат филмови од поранешните југословенски републики со акцент на кинематограферската работа и кинематограферите како автори.

На фестивалот свое учество зема и Македонската Асоцијација на кинематографери – МАК при Друштвото на филмските работници на Македонија (ДФРМ), најстарото релевантно струково здружение од областа на филмското производство и останатите аудио-визуелни медиуми, чии цели се остварување и заштита на правата и интересите на македонските филмски професионалци, кои делуваат на територијата на Македонија и во странство, како и обезбедување континуиран развој на филмската дејност, стимулирање и унапредување на филмската професија, промоција на филмската уметност и култура во нашата земја.

Македонската Асоцијација на кинематографери оваа година учествуваше со филмови кои се снимени во Македонија од македонски кинематографери и поддржани од Агенцијата за филм на РС Македонија.

Проекциите на МАК почнаа на 19 јануари со краткометражниот игран филм „Северен пол“ од кинематограферот Владимир Самоиловски. Следниот ден, на 20 јануари беа прикажани долгометражниот игран филм „Мими“ на кинематограферот Дејан Димески и студентскиот краток игран филм „Прогестерор“ на кинематограферот Димитар Атанасоски од ФДУ – Скопје.

Последниот филм со кој се претстави Македонската Асоцијација на кинематографери беше „Тетовирање“, на кинематограферот Мишо Самоловски, а беше прикажан на 22 јануари, во рамките на програмата „Филмска легенда“.