Најновиот број на интернационалната книжевна публикација „Токиски поетски журнал“ (Tokyo Poetry Journal) со седиште во Токио, Јапонија, е посветен на визуелна и експериментална поезија со поднаслов „Визуелна /// Визионерска поезија“.

Ова инвентивно, сликовито издание вклучува разни јазици и писма, но и типови на визуелна поезија: калиграми, асемичка калиграфија, визуелна музика, колаж итн., а во него се застапени дури пет поети и уметници од Македонија, што е редок случај во Јапонија.

Македонското влијание во оваа јапонска публикација несомнено доаѓа од Зориа Петкоска К., член на уредничкиот тим и главен уредник на ова визуелно издание (секое издание има различен главен уредник). Таа е поетеса, наградувана преведувачка, поранешен асистент на Филолошкиот факултет во Скопје, МЕXТ стипендистка, која денес работи како писател, уредник и новинар во Јапонија. Авторка е на визуелната поетска збирка на македонски јазик „Зборигами“, во издание на „Матица Македонска“ (2015 г.).

Во визуелното издание на журналот се објавени македонските поети и уметници Елена Пренџова, Викторија Богданова, Ана Јовановска и Симон Калајџиев. Поетесата Пренџова учествува со песна на англиски јазик форматирана како HTML код, што ја прави песната визуелна и инвентивна.

Архитектката и постдокторски истражувач Богданова е поетеса со докторат на тема за поезијата во архитектонското скицирање и цртање. Нејзините „поемоцртања“ со инспирација од Јапонија и јапонската архитектура ја инкорпорираат поезијата во техничко поле како архитектурата.

Визуелната поезија е интер-жанр на границата на поезијата и визуелната уметност, па оттамy ова издание вклучува многу уметници кои ги спојуваат зборовите и уметноста. Јовановска е диппломиран уметник и често користи поезија и зборови во своите графики.

Уметникот Калајџиев е застапен со калиграфски дела со негово измислено писмо, како и глич-арт дигитални графики комбинирани со поезија од поетската книга „Дистокио“ заедно со Зориа Петкоска.

(Текстот е објавен во „Културен печат“ број 262, во печатеното издание на весникот „Слободен печат“ на 28-29.12.2024)