Младата репрезентација на Македонија до 15 години славеше победа со 5:1 над соодветната селекција на Ерменија во рамките на првото коло од УЕФА развојниот турнир за фудбалери родени 2008 година што се одржува во Скопје.

На тренинг центарот „Петар Милошевски”, видовме интересен прв дел со многу борба, трчање и отворена игра на двете страни. Македонија преку Стефан Бујаровски прва постигна гол во деветтата минута. Противникот во 20 минута успеа да се врати во игра и да го израмни резултатот. Извонреден погодок од далечина постигна Гаспаријан. Шест минути подоцна Александар Грашевски во една одлична соло акција и прецизен удар успеа да и донесе предност на Македонија од 2:1.

Избраниците на селекторот Раде Каранфилоски не отстапија од својот стил на игра и сосема заслужено постигнаа и трет погодок, а стрелец беше Стефан Бранковски. Истиот играч успеа уште еднаш да се запише во листата на стрелци зголемувајќи го резултатот на 4:1. Давид Ангелевски со ефектен погодок од далечина ги постави конечните 5:1.

Во рамките на првиот натпревар од денешната програма, Косово издвојува победа на Малезија по подоброто изведување на пенали. Во регуларниот дел од средбата, резултатот беше 2:2. На 7 септември во второто коло Македонија од 16.00 часот ќе игра против Малезија.

Македонија – Ерменија 5:1 (2:1)

Македонија: Енвер Фејзуловски, Мартин Џангаровски, Лорент Жаку, Ристе Стоилов, Матео Кесиќ, Иво Марковски, Давид Ангелевски, Стефан Бранковски, Александар Грашевски, Стефан Бујароски, Павел Грбевски;

Резерви: Антониј Трајковски, Цека Назиф, Стефан Стаматовски, Албан Рочи, Матео Каранфилоски, Давид Петрушев, Валмир Хамити, Бленд Ганиу, Душан Бојовиќ Заев;