Туристичкиот сектор во Македонија бележи зголемен интерес од странските посетители, при што Турците остануваат најбројните туристи. Според најновите податоци на Државниот завод за статистика (ДЗС), во октомври во земјата имало вкупно 107.672 туристи, од кои речиси три четвртини (74,2%) биле странски туристи.

Податоците покажуваат дека бројот на туристите за периодот јануари-октомври година е зголемен за 8,8% во споредба со истиот период претходната година. Додека кај домашните туристи има намалување од 1%, бројот на странските туристи се зголемил за 14,7%.

Во октомври 2024 година, најбројни туристи во Македонија биле турски државјани – забележани се 23.838 туристи од Турција. Српските туристи се на второ место со вкупно 6.582 посети, додека на третото место се посетителите од Германија (4.686), кои биле нешто повеќе од Грците (4.624). Од Бугарија во октомври дошле 2.768 туристи, од Хрватска 2.368, а од Полска – 2.367 посетители.

Во октомври во Македонија се евидентирани 211.611 ноќевања, од кои нешто повеќе од две третини (67,5%) се од странските туристи, а 32,5% од домашните туристи.