Во Струмица овој викенд ќе се одигра турнирот од третото коло на ЦЕВ Европската Златна лига 2025, каде домаќини се машката одбојкарска репрезентација и Одбојкарската федерација на Македонија. На гостински терен доаѓаат селекциите на Израел и Црна Гора, а натпреварите ќе се играат во спортската сала „Парк“.

Поради актуелната безбедносна состојба поврзана со Израел, по препорака од Министерството за внатрешни работи, два од трите меча ќе се одиграат без присуство на публика. Така, натпреварот меѓу Македонија и Израел, закажан за петок од 20:00 часот, како и саботниот дуел помеѓу Израел и Црна Гора, исто така од 20:00 часот, ќе се играат зад затворени врати.

Публиката во салата „Парк“ ќе има можност во живо да ужива само во неделниот натпревар, кога нашата селекција ќе се соочи со Црна Гора, со почеток во 20:00 часот.