Зголемената динамика на посети и средби на високи европски функционери и американски дипломати со државниот врв, но и упатените пораки, каква што беше таа на комесарот за проширување на ЕУ Оливер Вархељи дадена од Софија, дека интеграцијата на Западен Балкан мора да се забрза, според познавачите на состојбите, говори дека разговорите за тргањето на бугарското вето влегуваат во нова фаза од која во голема мера ќе зависи европерспективата на земјава.

Иако најавата на Бугарија дека ветото на Македонија останува и во јуни, доаѓањето на западните функционери во земјава извесно е дека носи нов дипломатски притисок за тргање на бугарската блокада до јуни, коментираат дел од домашните познавачи на состојбите посочувајќи дека земјава во моментов е најпримамлива дипломатска дестинација.

Анализирајќи ја динамиката на посети и средби, домашните експерти оценуваат дека влегуваме во финалната фаза на спорот со Бугарија и во исто време предупредуваат да бидеме внимателни при влечењето на потезите пред спротивната страна.

Универзитетскиот професор од Чешка, Михаил Вит смета дека меѓународната заедница цели кон создавање политичка атмосфера за постигнување решение за спорот со Бугарија.

– Секоја посета на значаен партнер од Европската Унија и САД, за Македонија може да се протолкува само како поттик во правец на разрешување на европските аспирации на земјата. Но, битно е да се напомене дека овие дипломатски визити не се само протокуларни средби туку напорни и мачни состаноци на кои се дискутираат горливи прашања кои ја задираат Македонија во наметнатиот спор од Бугарија за членство во ЕУ – вели за Слободен печат, чешкиот универзитетски професор Михал Вит.

Професорот подвлекува дека се додека стратешките партнери на Македонија се активни на оваа проблематика тоа е зрак на светлина во тунелот (спорот со Бугарија), и бидејќи сето се случува во период коа во светот примарно место за дипломатијата завзема несаканата војна во Украина.

Од друга страна професорот Јове Кекеновски не е убеден во проценките дека западните дипломати можат многу да сторат во насока на брзо тргање на ветото од Бугарија (во јуни), како што високите европски челници јавно декларираат. Според него тоа е така, бидејќи на многупати досега земјава била сведок на вакви и слични посети на високи функционири во минатото во времето на решавање на спорот со Грција кои во тогашниот момент не допринеле до брзо решение со Атина.

– Сигурно е дека странскиот притисок кон Бугарија за чесената и искрена земја како што е Македонија може да биде само од полза, единствено под услов да постои конзенсуз во ЕУ и Вашингот за проблемот. Доколку сериозно се пристапи кон спорот и не се прават калкулации во однос на тоа што добива а што губи ЕУ, може да дојдеме до брзо решение – вели Кекеновски.

Сепак, професорот во исто време истакнува дека треба да бидеме претпазливи за понудените решенија бидејќи и Бугарија има свои лоби групи кај истите партнери кои постојано ни прават топло ладно во реалациите со ЕУ, Бугарија и САД. Кекеновски заклучува дека наспроти поддршката која се зголемува за тргање на ветото, недостасува реализација на западните ветувања по тоа прашање.

Инаку, по вчерашната посета на Софија, еврокомесарот за проширување Оливер Вархеји  денес престојува во Скопје. Вчера од Бугарија тој порача дека преговорите со земјава треба да започнат до јуни годинава, а посетата ја заврши со порака на Твитер дека нема повеќе време за губење.

„Ја завршив мојата посета на Софија со надеж дека ќе можеме да продолжиме со нашата политика на проширување, додека руската војна прави да вложуваме повеќе напор во тоа. Му благодарам на премиерот Кирил Петков за отворената дискусија за идните чекори, кои ќе нè однесат до отворање на првата меѓувладина конференција меѓу Северна Македонија и Албанија“, напиша Вархеји.

Утре, пак, во посета на Македонија треба да пристигне помошник-државната секретарка на САД за европски и евроазиски прашања, Керен Донфрид. Како што минатата недела соопшти Стејт департментот, нејзината посета ќе биде за да ја сигнализира силната поддршка за почеток на преговорите на  Македонија со ЕУ.

Шефицата во Стејт департментот за Европа во посета на регионот, Македонија на листата за визита